ازاى تقدر تعيش ب 1000 جنيه

دلوقتي هقولكم ازاي تعيش ب1000جنيه في الشهر

البيان
مصروف يومي
مصروف أسبوعي
مصروف شهري
ملاحظات

عيش بلدي 1 جنية في اليوم يعني 30 جنية في الشهر بس لازم تلحق دورك فى طابور الفرن وتلحق شغلك فى نفس الوقت ربنا معاك

حليب 4 جنية في اليوم يعني 120 في الشهر عدد واحد لتر يومياً ويارب ميطلعش بودرة سيراميك ويكفى العيال

فول 8 جنية في الاسبوع يعني 32 في الشهر كيلو فول اسبوعيا يعنى 125 جرام يوميا رضا والحمد لله

جبنة بيضاء 20 جنية في الاسبوع يعني 80 في الشهر كيلو في الأسبوع 125 جرام يوميا انت عايش

بيض 5 جنية في الاسبوع يعني 20 في الشهر عبارة عن 10 بيضات فى الاسبوع يعنى لو اربع افراد يبقى بيضه ونص يوميا للاربعة

خضار 10 جنية في الاسبوع يعني 40 في الشهر عبارة عن صنف واحد بس + كيلو طماطم + لمونه وحزمة جرجير اسبوعيا

فواكهه 5 جنية في الاسبوع يعني 20 في الشهر عبارة عن كيلو برتقال أو قشر موز مرة اسبوعيا علشان العيال تفتكر اسمة

شاى 10 جنية في الشهر لزوم الكيف اللى بيذل والضيوف الرزلين

سكر 4 جنية في الاسبوع يعني16 في الشهر عدد واحد كيلو اسبوعيا مش بقولكم الكييف يذل وضيوف معندهمش دم

ارز 4 جنية في الاسبوع يعني 16 في الشهر عدد واحد كيلو اسبوعيا للعائلة كلها يعنى 125جرام يوميا متوسط الفرد 40 جرام

زيت 10 جنية في الاسبوع يعني 40 في الشهر لتر اسبوعيا علشان تشرب بق على الريق يزيت معدتك 000 يستعمل كبديل للخضروات

مكرونه 8 جنية في الاسبوع يعني 32 في الشهر عبارة عن عدد 4 كيس 400 جرام اسبوعيا 0000 خلى العيال تنبسط

دجاج 20 جنية في الاسبوع يعني 80 في الشهر عدد واحد دجاجة اسبوعيا للعائله 000000 اظن معقول

لحم 20 جنية في الاسبوع يعني 120 في الشهر عدد واحد كيلو لحم اسبوعيا لزوم صنف الخضار واللمونه وحزمة الجرجير 000 الف هنا

بقوليات 10 جنية في الشهر عبارة عن كيلو واحد بس شهريا ونقى اللى بتحبه براحتك ( عدس - لوبيا - فاصوليا )

توابل 10 جنية في الشهر عبارة عن دقيق + ملح + كمون + فلفل + كسبرة + وممكن تديها خل براحتك

صابون 15 جنية في الشهر عبارة عن صابونه واحدة للحمام + صابون مواعين + مسحوق للملابس ( النظافة عموما )

مواصلات2 جنية في اليوم يعني 60 في الشهر بعد طابور الفرن تركب أتوبيس الهيئة ذهاب وعودة وبهدله وفرهده لفرد واحد يوميا

حلاق 10 جنية في الشهر عبارة عن حلاقة الشعر + ماكينات حلاقة الذقن ( طبعا متنساش انت جبت صابونه للحمام هى هى الصابونه اللى هتحلق بيها دقنك ( نعيما ياباشا )

مدرسة 10جنية في الاسبوع يعني 40 في الشهر عبارة عن مصروفات المدرسة + مصروف العيال اليومى + كراسات واقلام وجلاد 00ألخ

دكتور 30 في الشهر نمرض بالدور طبعا عدد اربع افراد مرة واحدة للفرد كل 4 اشهر وربنا يستر

ادوية 50 جنية في الشهر أكيد طبعا العلاج بالدور وربنا يستر واتنين ميمرضوش فى وقت واحد تبقى كارثه

تليفون 10 جنية في الشهر اشتراك الهيئة هنرد بس ومش هنتكلم معدش ينفع كلام

مياة 10 جنية في الشهر للاسف لازم نشرب مياة ملوسة بالمجارى

غاز 5 جنية في الشهر الحمد لله غاز طبيعى الله فى عون اللى عنده انابيب ( 10 جنيه للانبوبه ) وممكن تطلع فاضية

نور 20 جنية في الشهر لمواكبة التطور غساله ملهاش مسحوق - تلاجة فاضية - بوتجاز يستخدم مرة كل اسبوع

قمامة 10 جنية في الشهر اجبارى طبعا ومن الواضح ان العشة دى مفيهاش اكل اساس يبقى القمامة هتيجى منين

بواب 15 جنية في الشهر مهو من حقه يعيش هو كمان لو عشر شقق يبقى 150 جنية شهريا خليه يهيس

صيانة 30 جنية في الشهر لاصلاح الاجهزة بالدور غساله - سخان - بوتجاز - مروحه - تلاجة - سباكة - لمبات انارة الخ

ملابس 100 جنية في الشهر عبارة عن الصيفى والشتوى داخلى وخارجى واحذية وشربت وكلونات واتصرف بقى

الاجمالى

1081
اكيد اللى هيخليك تعرف تعمل الكلام اللى فوق ده هيخليك تتصرف وتضغط مصروفاتك شويه علشان تبقى الحسبة 1000 جنية اقولك متمرضش ومتخدش ادوية وشيل 80 جنية معلش ربنا يقويك وينصرك على من يعاديك ويكفيك شر المرض

ايجار الشقة طبعا قانون جديد وللاسف ملهوش قانون كل واحد وبخته ومش هنحسبها كل واحد يقعد عند امه وبالمناسبة

عيد الام ربنا يخليها ويديها الصحه
0
كل سنة وهى طيبة

عيد الكحك
مضر وملهوش لزمة
0
كل سنة وانتم طيبين

عيد اللحمة
مضر وملهوش لزمة
0
كل سنة وانتم طيبين

حلاوة المولد
السكر مضر وملهوش لزمة
0
كل سنة وانتم طيبين

ورمضان كريم وخيره كتير

أخ خ خ نسيت احسب زكاة الفطر بس مش عارف هدفع ولا هأخد ؟

عموما هقولكم على قائمة الممنوعات والمحظورات 000 متقربوش منها علشان تعرفو تتنيلو وتكملو الشهر

ممنوع عنك الحلاوة والمربى والعسل والزبدة وكافة انواع الجبن عدا ماذكر فى التعيين ( الجبنه البيضا )

المعلبات تونه بلوبيف لانشون سالمون فول وطبعا البسطرمة والزيتون والمخللات ممنوووووووووووووووع

اوعى قلبك يحن لعيل من العيال وتجيبله شيبسى ولا ببسى أو كراتيه ونايتى عسلية بسكوت شيكولاته اياك ومنتجات العيال الصغيرين حتى لو حليب بالفواكهه او لبانه وجيلى كولا وهوهوز حتى الشيتوس يتفرج على الكرتون بتاعه فى التليفزيون ومتخليهوش يتفرج على الاعلانات بين الفاصل

احظر اللحوم بانواعها البفتيك والاستيك والرقبة والموزة واللوزة كله كلام فاضى خليك فى تعيينك الاسبوعى

ومتنساش ان البانية والفليه من الممنوعات ومتقربش ومتمشيش فى الشارع جنبك كنتاكى وهاردييز وهاربيز وتكه ومؤمن وكوك دور واياك من السندوتشات عموما زى الطعمية والبطاطس والبذنجان الحجات الحلوة دى مش مطلوبه تعملك حموضه وهتحتاج فوار واحنا منعناه مع الدوا وطبعا مش محتاج اقولك وافكرك انك ممعكش فلوس علشان يبقى نفسك فى سندوتش فرنساوى مليان كبدة اسكندرانى ولا مخ

خليك واقعى وانسى المحمر والمشمر واللب والسودانى والتسالى بانوعها والمحمصات والمقرمشات والمكسرات بانواعها يالعربى انت زى العصفورة تاكل عيش ودنيبة رز وتشرب ميه عمرك سمعت عن عصفورة ركبت دش أو وصلت نت او حتى فكرت تاكل ترمس او تشرب حمص كله كلام فاضى ممنوع ياسيد

اهم حاجة مترحش لدكتور متجبش مدرس ولا ادوية واياك من المعجنات زى البيتزا والفطائر ومش محتاج افكرك ان البسبوسه والجلاش والكنافة والقطايف والجاتوة والشاتوة والتورت وام على وصوابع زينب ورموش الست والكحك والغريبة ممكن تستغنى عنهم

طبيعى انك مش هتقرب من الفواكهة خالص البرقوق المنجو البطيخ الفراوله الكيوى الخوخ العنب التفاح حتى الكاكا والحرنكش والنبأ والقصب والدوم والتوت ممنوع سيادتك

وطبعا معجون الاسنان والحلاقة والشامبو والبلسم كلها رفهيات ملكش فيها زى البصل والتوم والبطاطس كلها اساسيات ملكش فيها برضه ومتنساش تبعت الميل للناس اللى تعرفهم هما اكيد زيك محتاجين شوية نظام مش اكتر هما غلابة وفكرهم يقولو لعيالهم لو شافو مسلسل فى التليفزيون مليان بهرجه ان دى قصص خياليه كانت فى العصور القديمة فترة من الزمن و ان الواقع زى ماهما شايفيين حتى الاعلانات حاولو تفهموهم انها مجرد الوان مبهرة وتكنولوجيا فى علم التصوير وتخيلات ممكن تحصل بعدين زى ماحصل فى امريكا وكندا وفرنسا والمانيا واوربا كلها وان الحجات دى علشان لما الناس دى يجو عندنا يلاقو منها ويعرفو يعيشو هى مش لينا دى ليهم هما اصحاب البلد ولازم ينبسطو

عموما لو على الكلام مش هيخلص روح الحق طابوووووووووووووووووووووووووور العيش تبقى نصيبة لو عطلتك ورحت لقيت الفرن شطب

ههههههههههههههههههههههههههههههههههه
الحمد لله على كل شئ على العموم
مشكور يا لول