1- لما تقف تشترى كيس مناديل من البقال وتلاقى واحد جاي بيقول للبائع هات علبة سجائر كليوباترا بس بلاش اللي عليها الرسمة بتاعة السرطان اللي معمولة جديدة والبائع قال له مافيش غيرها والراجل مشي وهو زعلان جدا علشان كل مايروح لحد مايلاقيش غيرها.... يبقى انت اكيد فى مصر
2- لما تقعد في مترو الانفاق ويركب راجل ومراته الراجل عادي لكن مراته لابسة لبس مش ممكن لدرجة انها تلفتت نظر الناس كلها في العربية وتكون لابسة استرتش وبلوزة قصيرة يادوب على حزام وسطها وشعرها سايح ونازل على ضهرها ويقعدوا في الكرسي اللي جنبك وفجاة هى وجوزها كل واحد يروح مطلع كتاب اذكار الصباح وقعدوا يقروها سوا ..... يبقى اكيد فى مصر
3- لما راجل رايح يشتري علبة سجائر ال ام من الكشك والبائع يقله له خمسة جنيه والراجل مصمم انها اربعة ونصف فقط والبائع ايضا مصمم انها خمسة جنيه والراجل يقعد يلعن سلسفيل البشر كلهم و يقعد يهرتل بكلام مثل ( كفاية ظلم بقى – احنا هنلاقيها منين والا منين – ايه الاستغلال دة ) ...... يبقى انت اكيد فى مصر
4-لما تركب مرة تاكسي والسواق حاجة مش معقولة مايسبش حد معدي بعربية جنبه والا امامه والا وراه والا حتى في المقابل الا ويشتمه ويسب له وكل شوية يقول شايف ابن ال......... ماشي ازاى اما الغريب بقى في الموضوع ان السواق ماسابش مخالفة بتتعمل الا وعملها لدرجة انه بيلاقى الطريق قدامه واقف يروح ماشي في المعاكس و علشان يدخل عالمعاكس كان لازم يكسر مرة واحدة شمال وطبعا من غير مايدي اشارة .... يبقى انت اكيد فى مصر
5- لما تركب اوتوبيس تبع هيئة النقل العام الا والسواق او الكمساري لازم يركن على جنب ويجيب عصير او تمر او سندوتشات او كشري وساعات بقى يقرر انه يجيب عيش وطبعا ساعتها بننزل كلنا ونسيبه وان كانوا واكلين وشبعانين ومش هينزلوا يجيبوا حاجة يبقى الاتوبيس اكيد هيعطل وبرضه هننزل هننزل.... يبقى انت اكيد فى مصر
6- لما تلاقى اشارة المرور منورة احمر وبرده العربيات ماشية ولا فى دماغها وعسكرى المرو لا حول له ولا قوة .... يبقى انت اكيد فى مصر.
7- لما برده تعدى على تقطاع عربيات وتلاقى اشرة المرور الوانها التلاته ملونين ( احمر - اصفر - اخصر ) يبقى انت اكيد فى مصر
8- لما يبقى جنب بتكوا عمود نور بينور بالنهار وبيطفى بالليل ..... يبقى انت اكيد فى مصر
9- لما يكون عمود واقف لوحدة فى الشارع وطوله حوالى سبع او 8 متر وتلاقى الفنوس بتاعه مكسور من فوق ...... يبقى انت اكيد فى مصر
10- لما تلاقى عمود النور سلوكه كلها عريانه للى رايح واللى جاى .... يبقى انت اكيد فى مصر
11- لما تكون ماشى فى الشارع وتلاقى واحد رابط حمارة فى عمود النور اللى هو متعرى اصلا ..... يبقى انت اكيد فى مصر
الخميس أبريل 10, 2008 1:00 am
