فى دولة ساكسونيا العظمى القوانين مختلفة عن اى دولة تانية ، دولة ساكسونيا غير كل الدول ، حلم لاى حاكم ظالم عاوز يعمل اللى هو عاوزه فى الشعب ، والشعب غير اى شعب ، اخد على الخنوع والسلبية ومش بيطالب بحقه مهما اتعمل فيه.
دولة ساكسونيا العظمى الاعراف والقواعد والاخلاق والقيم فيها مقلوبة ومش مضبوطة ، الغلط بيبقى صح والصح بيبقى غلط ، والكل راضى ومبسوط وسعيد.
فى دولة ساكسونيا العظمى ممكن تقتل وتسرق وتنهب وتسب وتلعن ، وتهرب بجريمتك ، وممكن تكون مظلوم وبرئ بس يتحكم عليك ، وده اصبح العادى فى دولة ساكسونيا.
فى دولة ساكسونيا طبقتين ، طبقة سادة بتاخد اللى هى عاوزاه ومش بتشبع ، وبتحكم فى الطبقة التانية بمنتهى الافترا ، الطبقةالتانية طبقة عبيد ، جوة الطبقة دى بطبقات ، طبقةناس متعملين ومعاها فلوس يادوبك مكفياها ، وطبقة تانية يادوبك قادرةتعيش ، وطبقات تالتة بتعيش عيشة الحيوانات فى الغابة.
فى دولة ساكسونيا العظمى من السهل تكون مسئول عن مقتل الاف الاشخاص لانك استرخصت دمهم ، وتطلع براءة ، تطلع بكل بجاحة تتحدى اى حد يكلمك ،ماهو اصل القضاء العادل فى دولة ساكسونيا ليه حكاية هو كمان، ده غير انك ممكن تكون مسئول عن مصيرشباب فى ثانوية عامة اهلهم صرفوا عليهم دم قلبهم وضهرهم انحنى من المذاكرة وتنتقم منهم بامتحانات تعجيزية لمجرد انهم مش ولاد باشا او بيه يقدر يشترى الامتحانات.
فى دولة ساكسونيا العليا القضاء غير اى قضاء ، قضاء بيعتمد على ورق يضربه اى محامى مش عنده زمة ويطلع المجرمين والفاسدين براءة لمجرد ان مفيش دليل ضده ، وسهل كمان تقدم حد بداله كبش فدا يلبس القضية ، وترجع تسال انت ياقاضى ليه مش بتحكم بروح القانون ، والرحمة فوق العدل ، وانت متاكد ان فلان مذنب ليه تديه براءة ، يطلعلك ناس تدافع وتقولك ازاى تتكلم عن القضاء فى دولة ساكسونيا ؟ القضاء لسة بخير، ولا نسمح لاحد بالتطاول على هيبة القضاء التى هى مهنة مقدسة ، وكأن القضاة دول ملايكة مش بيغلطوا.
فى دولة ساكسونيا من العادى انك تسب بالدين ، ومن السهل تسمع ناس مش مسلمين بيسبوا للرسول ويشتموه ويطلعوه ارهابى ،عادى ، لكن اللى مش عادى انك تسب الحاكم او عيلته او حاشيته ، كده تبقى انت آثم.
فى دولة ساكسونيا العظمى لو طلعت مظاهرات او عملت اعتصامات عشان عاوز تصلح حال البلد يبقى انت كافر وآثم، ولو انت مرحتش انتخبت حاكم ظالم يبقى انت كافر وآثم ، متستغربوش ، ماهو الدين بيستخدم فى خدمة اله بشرى بيعبده رجال الدين فى الدولةالغريبة دى، رجال الدين اللى هما حملة كتاب الله ، بيعبدوا اله غير الله !
الجيش بقى فى دولة ساكسونيا اللى ياما رفع راس البلد زمان وذل اقوى جيوش العالم بقى من غير لا شغلة ولا مشغلة ، شغلته الوحيدة السيطرةعلى البلد لو حصلت حاجة - وده مستحيل على فكرة- تهدد امن العائلة الحاكمة، اما لو حصل احتلال خارجى ، فاول حاجة هايعملها الجيش اول لما يمسك سلاح هايقتل فى بعضه.
الاعلام بقى فى دولة ساكسونيا العظمى غير اى اعلام ، اعلام حكومى موجه مسخر للحكومة ، مهمته الوحيدة الهاء الشعب عن البلاوى اللى فى البلد، وبيستخدم الرياضة بالذات لالهاء الشعب ، مرة فزنا بكاس الامم فى الكرة الشراب ، ومرةالحارس الهارب ، ومرة خناقات الاندية الكبيرة على اللاعيبة ، ومرة واحد مجنون بيطلع يشتم ويسب ويلعن فى كل حتة ، مش قلتلكم ده العادى فى دولة ساكسونيا؟
فى دولة ساكسونيا الخير موجود فى كل مكان ، نهر بيجرى بقاله كتير ، بحرين فوق وتحت مليانين خير ، ارض شاسعة وثروات معدنية وبشرية بالهبل ، ده غير دخل السياحة والقناة البحرية ، ومع ذلك الشعب مش لاقى ياكل؟ ازاى مش عارف؟
دولة ساكسونيا فيها كل شئ مباح ، دولة مختلفة فى كل حاجة ،دولة مستحيل تكون موجودة ، لان لو فيه دولة كده المفروض الشعب العادى يموت ، اصله هايعيش ليه فى دولة زى دى؟ ولا يكونوا عايشين وهما ميتين؟ الله اعلم...
ملحوظة:
اى تشابه بين ملامح دولة ساكسونيا العظمى وملامح دولة اخرى هو تشابه مقصود ولا حول ولا قوة الا بالله
السبت أغسطس 16, 2008 5:19 am